मार्चचा पहिला आठवडा सुरू झाला होता. मी लिखाण थांबवलं नव्हतं, उलट अजून जास्त अभ्यास करून आणि चुकीला, सुधारणेला वाव न ठेवता काळजीपूर्वक लिखाण करत होतो. मी स्वभावाने मनस्वी होतो, असं काळजीपूर्वक वागणं माझ्या स्वभावाच्या विरुद्ध होतं; पण तरी मी ते करत होतो. अचानक मला माझी सईशी काही दिवसांपूर्वी झालेली चर्चा आठवली. माझा मुद्दा मांडायला मीच तिला अनेक उदाहरणं दिली होती.
‘सई मला नेहमी वाटतं, weakness is overrated! लोक त्यांच्याकडे असलेल्या गोष्टींचं कौतुक करण्याऐवजी त्यांच्याकडे नसलेल्या गोष्टींवर जास्त लक्ष देतात. पण मला वाटतं जर आपण आपलं लक्ष आपल्या सामर्थ्यांकडे आणि आपल्याकडे असलेल्या गोष्टींकडे वळवलं तर काही वीकनेस असूनही आपण यश मिळवू शकतो. म्हणजे बघ ना, शाळेत, कॉलेजमध्ये ज्या विषयात कमी मार्क्स पडतात त्याची ट्युशन लावतात. का? कारण तो विषय आपल्याला अवघड जातो आहे. मी अशी उदाहरणं सांगू शकतो जिथे मुलाचं इतिहास छान होतं; पण गणित कच्चं. आईबाप काय सांगतात, ‘तुला इतिहास येतंच, त्याचा अभ्यास जरा कमी कर, गणितावर जास्त लक्ष दे.’ मला सांग असं का नाही म्हणत गं, ‘तू गणितावर पास होण्याइतकं लक्ष दे, बाकी वेळ इतिहासावर म्हणजे तुझ्या स्ट्राँग पॉइंटवर लक्ष दे?’
सई : अनिकेत, तू काय म्हणतोस ते मला समजलंय, पण आपल्यातील कमतरता दूर करणे, त्या सुधारण्यासाठी काम करणं महत्त्वाचं नाही का?
अनिकेत : नक्कीच. आपले विकनेस ओळखणं आणि त्यावर काम करणं चांगलंच आहे. पण जे नाही त्याचाच विचार करत बसण्यापेक्षा जे आपल्याकडे आहे, त्याचा उपयोग करून कसं पुढे जाता येईल यावर लक्ष दिलं तर, विकनेस असून आपण पुढे जाऊ शकतो. हे बोलत असतानाच मला जरा मळमळ वाटत होती. जास्त खाण्यामुळे झालं असावं, असं मला वाटलं आणि मी जरा घरात फेऱ्या मारत बोलत होतो.
सई : पण पुढे जाताना आपला विकनेस आपल्या प्रगतीच्या आड येणार नाही का?
अनिकेत : येईल ना! एक उदाहरण देतो, वीरेंद्र सेहेवाग पाहा, नव्हता डिफेन्स चांगला त्याचा, काही फरक पडला का? त्याच्या स्ट्रेंग्थनी खेळला तो नेहमी. वीकनेसवर थोडं काम केलं असेलही, पण त्याच्यावरच फोकस करत बसला नाही आणि स्टॅटेस्टिक्स समोर आहे, सेहेवाग हा यशस्वी खेळाडू झाला. डिफेन्स चांगला नसून टेस्टमध्ये दोनदा त्रिशतक मारलं त्याने. त्याउलट इरफान पठाण, तो कोच आणि मीडिया ह्यांच्या दबावात जे नाही त्यावरच काम करत बसला, जे उत्तम येत होतं ते मागे पडलं. स्पीडच्या नादात, स्विंग पण गेली. तो जगातला टॉप बॉलर बनला असता, पण नाही झालं तसं. Weakness is overrated. माझ्यासाठी हा युरेका क्षण होता.
Granthpremi
